عام وعام

عام نام وعام بعدو فاق ................ وغصن الأماني غنت طيورو
والنور ع خد الفجر سبّاق .................... بكر يغمر بالندى عطورو
والحرف شفتو للوحي مشتاق ............ ومشتاق مذبحنا لبخورو
والشمس طلت تفتح الآفاق ........... تمحي لشرشف ليلنا سرورو
عام إنتهى بجمايلو وما راق ............ ولا تبارك المؤمن من نذورو
ضج بغضب خلى المدى سرّاق ..... بيسرق نجوم الشعب وبدورو
تطاول بموتو ع أماني عتاق ................. يا ريت كسّر عهر بللورو
صرنا يتامى مننطر الإشراق ......... بعام اللي بديت تضبط أمورو
وعام إبتدى يحشد على الأوراق ........ طيب مرج الخير وزهورو
بيوعد يخلص بالمبادي عناق ... الشعب اللي صفى الهم دستورو
بيوعد برحمة من لطف خلاق ......... حاشى يكون الظلم منظورو
بيوعد بلدنا بالنصر ورفاق ............. ضحوا وكتبوا دم ع سطورو
يا سورية يا جنة الأذواق ............... شعبك أسود الكون ونسورو
نهر السلام الطيب الدفاق ............ بأرضك بيذل الغرب وشرورو
يا ريت يصفى هالزمان الضاق ........ فينا ع وسع البحر وشعورو
مازال بلش بالخلاص عناق ..........يبلش حنانو يشفق من جديد
                          ويطل فجر الحب من نورو

كل عام وأنتم بألف خير

اللة دخيلو بهالفضا المفتوح .......... أرسل رسل بالحب تهدينا
تداوي بلطفا قلبنا المجروح ............ ومن جنة الأعمال تهدينا
وحتى على الدنيا نجي ونروح ......... ما بيختلف إلا أسامينا
أما دخيلو للجسد والروح ...... ساوا ما بين الناس فيها وصار
يبعث بشاير رحمتو فينا

إلى الأمتين الإسلامية والمسيحية أتقدم بالتبريك والتهاني بالأعياد المجيدة وكل عام وأنتم بألف ألف خير

شهداء جرمانا

صهيون هيي وبلش الفلي .......... بدها براسك تطلع الفلي
وديت إلنا جنود منكسرا ................ خلي ألمها ينفعك خلي
فكرت فينا بتزرع الكسرا ......... زرعنا براس المعتدي العلي
جارك حلقها لحيتو العسرا .......... بشعرات دقنك بلش البلي
بأيلولك الأسود بعد حسرا ....... التاج البريطاني إرتكب زلي
بلفور جملة قال مختصرا ....... وغار وترك شعبي على الهلي
وطل الأميركي من عدا بصرا .. اجتاح العراق وما رحم ملي
وذلو إنكتب ع عتبة البصرا ....... تذكر هولاكو وبلش يصلي
ومع سورية الأمجادها قصرا ............ جربت منها دلوك تملي
أرسلت داعش يخطفوا أسرا ..... ونصرة وفتح وكنت بالشلي
ولما إنكشفت بآخر المسرا ............... طليت تبلا ريتها الطلي
الجيش اللي حطم داعش ونصرا .... تأكد بإنو نذر يا صهيون
                                قرر يرجع أرض محتلي

مبارح بمطرح ما غفي القنطار ...... بشال البطولة الخالد تفيا
صاروخ ع مجدو المكلل دار ........... غّفى عيونو والبشر عيّا
ومقاومتنا مجد ما بينهار ............... بتفيق حتى تظل تتحيا
نادت يا موطنا الحبيب إختار .... جنود المجد ع الموت تتهيا
يا بلادنا وردك بخدك غار ........ من خدودك اللي مرجها مضيا
بالحرب عزماتك مارح تحتار ............. إم البطولة مجدك وبيا
ولولا غفي قائد من الأبرار ................ ثريا وبعدا بتوهج ثريا
بالعز بدنا نكمل المشوار ............... جيشنا الغالي وحزب الله
                              تا يظل عالي إسم سوريا

قالوا بطلنا بواجبو ما هان ......... وساح البطولة موقفو بيشهد
سجل شجاعة وحطم العدوان ......... ودمو بربانا الشامخ تعمد
تعود يكون بأول الفرسان ............ ويترك مجالو هيك ما تعود
وتوج نضالو للمعالي وكان ........ فارس بعد ما بوقفتو إستأسد
وفرحان ياما بواجبك شعلان ... ومجد الوطن ع كتفك بيصعد
قيمة من الجولان والإيمان ........ من وجهك البسمة إجا يشحد
ولما الواجب حضر الميدان ......... والعز جاب من البطل موعد
استحليت درب الآخرو عنوان ...... بنور الشهادة وإسمك تخلد
واليوم يا فرحاننا الإنسان ............. قلبت فيك بموقفك منجد
إصرار قلبك ع الوطن ما لان ...... ومجدك أخذني لأبعد وأبعد
وبكرى مننطر مع ورد نيسان ........ يرجع ربيعك يزهر ويسعد
ما زال مع نيساننا الجولان ........ بيعود فيكم يعقد من جديد
                    مطرح ما نمت وجسمك استشهد

نحنا بموطنا ما نخينا ........................ مين اللي عنا قال فلينا
بأبطالنا الخلوا الطبيعة تهز ................ كتبنا صلاة وفيه صلينا
لما دمانا ع ترابو تنز ................... بيخلق مجد أبيض ع إيدينا
كاس النصر بالمكرمة منمز ............ ونفتح على التاريخ عينينا
وأبطالنا نثرنا عليهم رز ............... راحوا وبقت روحن حوالينا
بمجد الوطن هني رجال العز ......... وجناحهن تا تصون موطنا
                          بتفلش خلودا الدايم علينا

برج الحوت المظلوم

برج الحوت المظلوم

ع طول حظك يا قلب مكبوت .. وبعرف على قلوب البشر بتفوت
والقهر بيفتك من ظنونك ............. بتقبل وبتصفي كحل مفتوت
ويا حلو كحل روعة جفونك ...ّ.. بجروح قلبي وجوهري المنحوت
رح ظل بين الكل مجنونك .......... وإكتب إلك أغلى غزل وبيوت
وبرجي يا برج الحوت ممنونك ...ّ.. بيت الرومانسية بدنية خوت
قلبك الطيب قيمة فنونك ......... بتعصر من الصخر العقيم زيوت
بتجمع قلوب الكل بعيونك ............ بتزرع مسرة والورود تخوت
بتبقى أساس الحب وديونك ..... ومن غير هالطيبة الزمن بيموت
جو الكواكب ظل مرهونك ..... وحدك بتحكي والحدعش سكوت
شو قيمة الأبراج من دونك .......... وما بتكمل الفرحة بزمن تعبان
              من دون ما تشرف يا برج الحوت
مسا الخير للحبايب

بين ضلعيني

يا من سكنتي بين ضلعيني .............. رجحت فيكي بالأمل عيني
خدودك بمكتبة العشق قرطاس ... خرطشت ع سطورا بحبر عيني
وشفاف حمرا خمرها مقياس .................. لوّن كرزها ورد الجنيني
وغمزة غوى منها العقل يا ناس ......... جال الدني برياش جنحيني
يا حلوتي الفيكي الوفا ما خاس .......... الياما حضنتك بين كفيني
بلطفك عطيتي الكاينة إحساس .......... مشتاق سدد بالهوى ديني
كرمك فرض عنقودك الحساس ......... طبق الأصل عنقودنا الزيني
وقلبك طلع من مقلعو إلماس .......... ما فيش داعي إسألو العنوان
                                 بين الحنايا ساكن وبيني

فيزة محبة

يا سارقة من مزحك وجدك .............. وردة أمل بوسة على خدك
فرحة حنونة تا يطيب العيش ........ والحرف عم يعرق على يدك
نحل المحبة ع شفافك جيش ............. رايح ع مرجة زهرها ندك
حبي وجني ولا تقولي ليش ..... العاشق معو فيزة هوا ومسموح
                              فيها تكوني مثل ما بدك

الضاحية الجنوبية

إرفعي راسك بأبطالك يا ضاحي .... العبيرن عطر زهور الأقاحي
مشوا بدروبك بعز وجسارا .......... وإجوا أبطال من كل النواحي
إرفعي راسك إعتزي بهالبشارا ....... وقولي دمهم بلسم جراحي
غفوا فيي ورود بكل حارا ......... وتا غطي روحهم بفرد جناحي
شبابك مش بطولة مستعارا ........... سكبها العتم بالليل الإباحي
ولا مسرسب وعايش ع التجارا ....... بدساتير القانون الإنزياحي
ولا عطر وصبايا للإثارا ..................... بفتوة دين وهابي مزاحي
شبابك مرجلة وحب وحرارا ..... وفدا من فجرهن أشرق صباحي
يا ضاحي العز فاتحلك سفارا ...... بأرضو وقال موجي ع بطاحي
وقفتي ضد غربان الحقارا ........ وبنيتي مجد  ما بيمحيه ماحي
كبرتي بسيدك رمز المنارا ............. وشباب بتزرع بدربك أضاحي
حلفوا بدمهم يمحوا المرارا ....... وصفي كل شب ع درب الكرامة
                    بقلبوا يقول إشهد يا سلاحي

لا تغيب يا محبوب

قالت يا محبوبي بحنية ............... عمري إرتسم قدام عينيي
من وقت ما دشرتني وفليت ........... ما ظل إلا صورتك فيي
كنا سوى بأغلى قصيدة بيت ... شطر وشطر منخرطش سوية
كسرت روحي وصرت لو غنيت ......... إلا الألم ما يفهم عليي
                                                                                     * * * *
غبت خلف الورد والياسمين ...... وبعدو العطر ع ثيابك مندي
وإلا الجوى ودموع بردانين ......... ماظل قاعد مطرحك حدي
                                                                                    * * * *
ريتك مثل دورة زمن دوار ............ لو غاب نيسانك ببستاني
بدعي الطبيعة تفتح الأزهار ........ وترجع معي تزهر بنيساني
                                                                                   * * * *
وتا إلمسك ويذوب قلبي شوي .. جسمك يا ريتو ساقية يصفي
بنزل بأشواقي بدموع المي ......... وبموج من ضفة على ضفي
                                                                                    * * * *
وبكبر معك ع غصنك النفناف ............... حبة ثمر ع إمها تاكي
وبذوق أحلام الهوى بشفاف ........ إشتاقت تقطف منك فواكي
                                                                                    * * * *
والحب يكوينا سوى بالنار ........... ويحلا معو بالشوق مصدرنا
ونضحك وندفن بقوة الأسرار .................. ويذوب أولنا بآخرنا
                                                                                  * * * *
ويطل آب ويبرم الدولاب ......... بوهجو اللي خلا ورودنا يحمو
وبالسر ع غفلة أماني آب ................. هالخد ياخذ حق من تمو
                                                                                  * * * *
وبعدو يجي أيلول وتشارين ......... وغصن الزمن ع البرد يتعرا
نغفى معو بأشواق مشتاقين .......... وندفى بوهج قلوبنا الحرا
                                                                                  * * * *
ولو غبت مع دم الشتا تراتيل ...... وطولت عني وذبت بالغيبة
تأكد غيابك يا حياتي ثقيل ............ عليي مثلما بتثقل الشيبة
                                                                                   * * * *
برجع على موسيقة التحنان ........... مرسال منك بس يحكيني
حسيت جايي مع فجر نيسان ... تمحي شو عم تكتب تشاريني
قلبي نقز ع عطرك الشعلان .............. لما سبق جسمك يلاقيني
ويطل صوتك والأمل خيطان ......... وينده يا قلبي جاي خبيني
تمنيت يا منجيرة الرعيان .......... تبقي صلاتي ودنيتي وديني
مازال فيكي بيرجعوا الخلان ............ بنيسانك يغلوا بشراييني
الروح صارت ملعب النسيان ....... حاجي الدمع والهجر يكويني
ما ظل إلا دمعة الوجدان .............. الفيها تنسيني التعب والهم
                        وحبي إلك عجزت تنسيني

تفجيرات باريس

تفجيرات باريس

يا من ع تفجير الفرنسي حد ......... يا ناعم بحضن الوفا رابي
شرقي إنت شرقك حفر ع الخد ...... بدموع آخو عصر وهابي
فكر قبل ما تقيم فينا الحد ....... ومن قبل ما إشعل بسرسابي
مين الخلق هالغول حتى إحتد ......... إلا فرنسة وغربها النابي
بكرى يا إستاذ الوفا لو رد ............. القاضي على أفلام كذابي
بيقول إبن اليعربي اللي هد ...... علينا الحضارة ووجه الطابي
ودور ع تفكير الدما المسود ............. تا يتهم شرقي وإعرابي
بقوايمو السودا رح بتنعد ......... مازال شرقي ويعربي بتصير
                          بتحقيقهم مجرم وإرهابي

مسا الخير

يا ليل يا بوابة سطور الحنين .............. وزع بشاير ع الشمال وع اليمين
ومحبوبتي اللي ساهرة بنور اليقين ..... أجمل جواهر وحي رب العالمين
يا ليل غطيها بشرشف ياسمين ..... وسحر الجمال بحرف ركعتلوا السنين
وضوي طريقا بالمحبة وبالأمل ........... ومسي بلطفك والفرح ع الباقيين

مساكم عسل

خيط الأمل

خيط الأمل قطعوه يا ذلي ........... وما عاد فيي أوصل لخلي
وبكوا عيوني من الدموع غلال .... وع حالتي زاد الوجد غلي
وصار الأمل ع مغربو مرسال ..... ما بين إحساسي العم يشلي
وبين الحبيب الواقف على قبال ... صفة فكر من قلب متجلي
كرمي بعنقودو على الأطلال ............ توقف ووقفني بهالطلي
بالأمس خيرو عم يعبي سلال ........ واليوم قهرو فاض بالعلي
ودخلك يا كوكب حق ما بتنطال ........ وين حقي صار متخلي
ووين الخطي بنورك ومازال ....... عندي الخطية إسم ع الهلي
الحرف اللي كنت بملعبو خيال ...... ما عاد رافقني وروي غلي
وعني بعد بالأوف والموال ........ وغادر عن ربوعي عن مطلي
وحتى حبيبي خبرو بأحوال ...... قلبي اللي عبى المي بالسلي
غيرت حالي بمر أصعب حال ..... وفليت من ترم السعد تا عاد
                        فيي وبراسي طلعت الفلي

خياط نسواني

قالت تا إظهر بين خلاني ................ عشتار ع الشاطي الأرجواني
الله نحت قالب الجسم رخام ................ الزند دري وعنق مرجاني
وتاظل لوحة فن ما إنلام ...................... بدور على خياط نسواني
تمنيت بين الجد والأحلام ..................... يوقف طلبها عند عنواني

وسرحت لحظة بين شمس وفي ......... وفيها عملت فنان تصويري
جبيني قبالا صار يعرق مي ..................... إتلبك ومن زود تعثيري
إن طولت فسطانا شباب الحي ...... بدهن يقولوا ليش شو السيري
وإن كنت قصرت القماش شوي ............... بتولع بقلبي نارها غيري

ومازورتي تا أخذت قياسات ............. ذابت ع إيدي والنظر تسهيد
دارت ع جسما اللي رسم لوحات ... بفن الوجودي وصار يعمل عيد
وسافر خيالي بغمرة اللحظات ............ وكل لحظة تخلق من جديد
وتا يطول حلمي بلذة الغمرات ........... صرت خربط بالقياس وعيد

وبمقص قص بلوعتي الوجدان ............. لحظة ولباب الأفلمة عافو
ذابوا عليها مشاعر الإنسان .................. الهونيك تكة بالقلب خافوا
قلبي استنى شوي ع فنان .................... تمتم محبة وحرك شفافو
وطرز ورد ع داير الفسطان .................... وعلق قلوب كثار ع زافو

وتكاملت صورة شمس للنور ............... وطلت قبالي روح حلياني
وبلش فؤادي يطوف سبع بحور ......... غناني محبة ويرسم غناني
وفكري سرقني للفرح مأسور ................. شوفا على أنغام وجداني
قلبي فراشة حولها بيدور ................... بنيران حبي الروح شعلاني
وقربت قصدي إكسر المحظور .............. ينطق لساني بحبها معاني
وحاولت إحكيها حناني سطور .............. وقف جمالا الساحر لساني
ولما إسودت ساعة الديجور ................ سمعت صوتا بلطف ناداني
شفتك سرحت بعالمي المسحور ........... مرة بتبكي بنظرتك وتعود
                                  تضحك بلهفة بشوق ملياني

بنت غنوجي

موجي يا لوحة من الفرح موجي ..  يا شفاف حمر بخمر ممزوجي
صوتك موسيقا من العشق شلال ...... عملق بحسو محمد الموجي
ضحكتي بدمعة بترسم الآمال ...... ع خدود نسمة عطر مدموجي
وخيطان سحر من المدى رسمال ... بثوب العشق للشرق منسوجي
لعبت ع خدك والشفق مختال ............ فراشات بالألوان مسروجي
تسرق من النور اللي ضوا هلال ......... بسمة محبة بلطف منتوجي
وجبين عالي بقيمة المشعال ...............  خلا عقول كبار محروجي
وطيبة قلب والحاملينو قلال ............ وكلمات مثل الروح بتصفي
                                ترقص كأنها بنت غنوجي

دفتر الماضي

حكينا فتحنا دفتر الماضي .......... شو كان أغلب وقتنا حاضي
كنت مش راضي معو وأوقات ... عنو بصفي من العشق راضي
بعدو الأمس باليوم بالساعات ... بيخطر ع غفلة يجلل حياضي
يسقي ورودي يفلفش النسمات ... يبلل دموعو بشهقة حواضي
ناديت قلبي يا أبو الهمات ........ سيف الوقت مانو فعل ماضي
بتقول كنا نخرطش البسمات ....... وكنا نذوب بوحي متغاضي
وما زال بعدو عمرنا مرايات ............. والأمس ع أفعالنا قاضي
منعيش ذكرى والمدى ورقات ......... كتبت عليها سنينا يا ناس
                              شوفوا العمر ما راح ع الفاضي

هجرة

وطنا الليل غطى إنتقادو ..............  وفتح ع الدم معبر إعتمادو
خلق شجرة محبة سرمدية ......... جنون الريح ما كسرت عمادو
وطنا نغمة الطير الشجية ........ الع غصن الحب غنى من سهادو
بجناحو فلفش البسمة الندية .......... التحدي والنصر حبو وزادو
شبابو بالعلم والأفضلية ..................... هني فيه جوهر إعتقادو
بنوا بعقول فهمانة وغنية ............. حضارة أرخت مجمل جهادو
وعندما دقت رياح المنية ................ ع لحن الشر والدم ومزادو
ع جنح الطير للغربة الشقية ........ حملوا همومهن والبحث رادو
وتجار الفتن والفوضوية ................ فتحوا بواخر الرحلة ونادوا
بجمع المال عملوا والخطية ............ الفيها تهجر البيت و ولادو
وأنا من غيرتي والمسؤولية ........ قلت الحق كيف وكيف حادوا
داعش عملت الحرب القوية .. وغلط كل شب ضب غراض بيتو
                         ونوي يتهجر ودشر بلادو

وينو قمرنا

وينو قمرنا طول غيابو .......................... فرخ بمرج القلب سرسابو
هوي بنورو موانس النجمات .................. وعشاق نورو بغيبتو ذابو
وينو اللي كان يرونق السهرات ....... ويرسم على سطر المدى شهابو
فل وتركنا من عدا بسمات ......................... مثل حرف مدشر كتابو
تعودت يا قلبي على الآهات ....................... لما حبيبك قفل حسابو
وصفيت تبكي وتمسح الدمعات ............ بحروف إسمو بريحة ثيابو
وتطبع لهيب الحب بالبوسات .............. مع كل نسمة تداعب عشابو
ومن بعد هالقصة صرت بالذات ............. كلما إنذكر محبوب قدامك
                                  تدعي لربو يعود لحبابو

سفينة نوح

بعدك بصمتك يا قلب مجروح ......... وصفيت بالآخ بتحي وبتروح
ومكلوم ما بيعرف جروحو وين ........ وعيون ع جروح الألم بتنوح
عشنا سوية بالوفا قلبين ....................كل قلب زهرة بالعطر بيفوح
وعينين فيهم للمدى عمرين ............. تاريخ بعدو عم بيبني صروح
قلبي الحنون العاش عمرو بين ......... وعد الدني بالحب لما يسوح
ووعد الحصيدي الخالدة بالزين ... الغلطة بفناها فعل مش مسموح
من عظم صدري تشلقوا لوحين ........ شديت وحدتهم بخيط الروح
وعملتها سفينة ببحر العين .................... وجمعت فيها كل أحبابي
                           تا صارت تضاهي سفينة نوح

حوريات بوتين

بوتين ودا بواشق محبي .......... طيور شقرا حسنها مخبي
عملت بطلتها علينا عيد .......... ونادت تعي يا داعش تربي
ع طلوعها صارت الأرض تميد ........ زلاغيطها أفراح بتعبي
بوساتها من الشوق نار وقيد ......... وبجهنم الأفراح منصبي
بقدومها بلش العيد يعيد ............. ع أرض سورية المنحبي
ومال الوهابي الكان عنا بعيد ..... شو جاب إلا ضيم ومسبي
قالوا الحواري لزلمهن بالإيد ........... بجو الشآمي بس تتأبي
بوتين ودا سحر كان جديد .. داعش مارادت هالحواري هيك
                      المش حاملة إلا غضب ربي

بعلمي الفروسية صهيل وخيل ...... وفرسان بالميدان محرورا
من ميل أفراح وهنا ومن ميل ............ غارات للتحرير منذورا
الغازي غفي ع سرير نار الويل . بسيخوي روسي كثير مشهورا
كالت بلطفا كل كيل وكيل ......... وحامت لحتى تعود منصورا
وع أرضنا الدم اللي مشى السيل .. توقف على هامات أسطورا
كل شب عنا عم يشد الحيل ........ وكل بنت بدها تغير الصورا
وللحج داعش بالحواري ميل ........... عندو وإلاهو بزاف تنورا
هو غفي ع صوت عهر الليل ....... ورجالنا سهروا على الأوطان
                           وفيهن بلدنا حفر محفورا

ونحنا بحواري العهر عنينا ....... مش شقر روسيا العم يردوا
أهل الفتاوي الراكضة لينا ........ لفات بيض وجوهن إسودوا
قالوا يا ربي أنعم علينا ............ ببيض الحواري الما بيتهدوا
الجنة تحت رفة جناحينا ......... وقصور  طيب خمورها ندوا
ولما السما كبرت بعينينا ............... بغنج العذارا الما بينعدوا
الجنة العليها كثير وصينا .. إن كانوا الحواري الساكنينا هيك
                 يا ريت عند الروس ينردوا

كفروا بحواري مغيرة العادي ... و رفضوا نوايا بهيد زوادي
وصوب الخلاص الكان يتهيا.. ع قبورهن هجوا بعتم غادي
وصارت أباة الجيش تتزيا ....... ثوب البطولة وتقلع العادي
فينا الشهادة نورها تضيا .... من تراب عطرو منعبدو عبادي
وطل الصبح والنرجس تفيا .. وياسميننا الشامي رجع نادي
والعز ضوا بوهجنا ثريا ........ ووقفت الدنيا هون ع حيادي
و إم البطولة مننا وبيا ......... إرتسمت ع نغمة بلبل الشادي
وإسم البطولة صار سوريا ..... كانت كبيرة بمجدها وبتظل
                    والكون منها بياخذ شهادي

بيت لندا

كتبت أن رفقاتها عم بتلف أوربا وهي قاعدة في بيتها (بيت لندا) تلف
سمبوسك كتبت على سبيل الدعابة:

قالتلي مسافرة ع البيت لندا ............... ركبت سيارتي ورايح لعندا
وصرت ع الدرب إستذكر غرامي .... وبراسي عملت شي مية أجندا
على شفافي إنسكب خمرة مدامي .... حلمت إغفى على تحنان زندا
قعودي صار يستجدي قيامي ................... وبقلبي فتح مليون بندا
ولأنو الحظ ما إستنى الملامي ........ ولحتى يضحكوا نانسي ورندا
وصلت وقبل ما بلش سلامي .............. لحقني كلبها اللي كان نايم
                                 بظل الوردة الحد البرندا
                                          هههههههههههه