دفتر الماضي

حكينا فتحنا دفتر الماضي .......... شو كان أغلب وقتنا حاضي
كنت مش راضي معو وأوقات ... عنو بصفي من العشق راضي
بعدو الأمس باليوم بالساعات ... بيخطر ع غفلة يجلل حياضي
يسقي ورودي يفلفش النسمات ... يبلل دموعو بشهقة حواضي
ناديت قلبي يا أبو الهمات ........ سيف الوقت مانو فعل ماضي
بتقول كنا نخرطش البسمات ....... وكنا نذوب بوحي متغاضي
وما زال بعدو عمرنا مرايات ............. والأمس ع أفعالنا قاضي
منعيش ذكرى والمدى ورقات ......... كتبت عليها سنينا يا ناس
                              شوفوا العمر ما راح ع الفاضي

هجرة

وطنا الليل غطى إنتقادو ..............  وفتح ع الدم معبر إعتمادو
خلق شجرة محبة سرمدية ......... جنون الريح ما كسرت عمادو
وطنا نغمة الطير الشجية ........ الع غصن الحب غنى من سهادو
بجناحو فلفش البسمة الندية .......... التحدي والنصر حبو وزادو
شبابو بالعلم والأفضلية ..................... هني فيه جوهر إعتقادو
بنوا بعقول فهمانة وغنية ............. حضارة أرخت مجمل جهادو
وعندما دقت رياح المنية ................ ع لحن الشر والدم ومزادو
ع جنح الطير للغربة الشقية ........ حملوا همومهن والبحث رادو
وتجار الفتن والفوضوية ................ فتحوا بواخر الرحلة ونادوا
بجمع المال عملوا والخطية ............ الفيها تهجر البيت و ولادو
وأنا من غيرتي والمسؤولية ........ قلت الحق كيف وكيف حادوا
داعش عملت الحرب القوية .. وغلط كل شب ضب غراض بيتو
                         ونوي يتهجر ودشر بلادو

وينو قمرنا

وينو قمرنا طول غيابو .......................... فرخ بمرج القلب سرسابو
هوي بنورو موانس النجمات .................. وعشاق نورو بغيبتو ذابو
وينو اللي كان يرونق السهرات ....... ويرسم على سطر المدى شهابو
فل وتركنا من عدا بسمات ......................... مثل حرف مدشر كتابو
تعودت يا قلبي على الآهات ....................... لما حبيبك قفل حسابو
وصفيت تبكي وتمسح الدمعات ............ بحروف إسمو بريحة ثيابو
وتطبع لهيب الحب بالبوسات .............. مع كل نسمة تداعب عشابو
ومن بعد هالقصة صرت بالذات ............. كلما إنذكر محبوب قدامك
                                  تدعي لربو يعود لحبابو

سفينة نوح

بعدك بصمتك يا قلب مجروح ......... وصفيت بالآخ بتحي وبتروح
ومكلوم ما بيعرف جروحو وين ........ وعيون ع جروح الألم بتنوح
عشنا سوية بالوفا قلبين ....................كل قلب زهرة بالعطر بيفوح
وعينين فيهم للمدى عمرين ............. تاريخ بعدو عم بيبني صروح
قلبي الحنون العاش عمرو بين ......... وعد الدني بالحب لما يسوح
ووعد الحصيدي الخالدة بالزين ... الغلطة بفناها فعل مش مسموح
من عظم صدري تشلقوا لوحين ........ شديت وحدتهم بخيط الروح
وعملتها سفينة ببحر العين .................... وجمعت فيها كل أحبابي
                           تا صارت تضاهي سفينة نوح

حوريات بوتين

بوتين ودا بواشق محبي .......... طيور شقرا حسنها مخبي
عملت بطلتها علينا عيد .......... ونادت تعي يا داعش تربي
ع طلوعها صارت الأرض تميد ........ زلاغيطها أفراح بتعبي
بوساتها من الشوق نار وقيد ......... وبجهنم الأفراح منصبي
بقدومها بلش العيد يعيد ............. ع أرض سورية المنحبي
ومال الوهابي الكان عنا بعيد ..... شو جاب إلا ضيم ومسبي
قالوا الحواري لزلمهن بالإيد ........... بجو الشآمي بس تتأبي
بوتين ودا سحر كان جديد .. داعش مارادت هالحواري هيك
                      المش حاملة إلا غضب ربي

بعلمي الفروسية صهيل وخيل ...... وفرسان بالميدان محرورا
من ميل أفراح وهنا ومن ميل ............ غارات للتحرير منذورا
الغازي غفي ع سرير نار الويل . بسيخوي روسي كثير مشهورا
كالت بلطفا كل كيل وكيل ......... وحامت لحتى تعود منصورا
وع أرضنا الدم اللي مشى السيل .. توقف على هامات أسطورا
كل شب عنا عم يشد الحيل ........ وكل بنت بدها تغير الصورا
وللحج داعش بالحواري ميل ........... عندو وإلاهو بزاف تنورا
هو غفي ع صوت عهر الليل ....... ورجالنا سهروا على الأوطان
                           وفيهن بلدنا حفر محفورا

ونحنا بحواري العهر عنينا ....... مش شقر روسيا العم يردوا
أهل الفتاوي الراكضة لينا ........ لفات بيض وجوهن إسودوا
قالوا يا ربي أنعم علينا ............ ببيض الحواري الما بيتهدوا
الجنة تحت رفة جناحينا ......... وقصور  طيب خمورها ندوا
ولما السما كبرت بعينينا ............... بغنج العذارا الما بينعدوا
الجنة العليها كثير وصينا .. إن كانوا الحواري الساكنينا هيك
                 يا ريت عند الروس ينردوا

كفروا بحواري مغيرة العادي ... و رفضوا نوايا بهيد زوادي
وصوب الخلاص الكان يتهيا.. ع قبورهن هجوا بعتم غادي
وصارت أباة الجيش تتزيا ....... ثوب البطولة وتقلع العادي
فينا الشهادة نورها تضيا .... من تراب عطرو منعبدو عبادي
وطل الصبح والنرجس تفيا .. وياسميننا الشامي رجع نادي
والعز ضوا بوهجنا ثريا ........ ووقفت الدنيا هون ع حيادي
و إم البطولة مننا وبيا ......... إرتسمت ع نغمة بلبل الشادي
وإسم البطولة صار سوريا ..... كانت كبيرة بمجدها وبتظل
                    والكون منها بياخذ شهادي

بيت لندا

كتبت أن رفقاتها عم بتلف أوربا وهي قاعدة في بيتها (بيت لندا) تلف
سمبوسك كتبت على سبيل الدعابة:

قالتلي مسافرة ع البيت لندا ............... ركبت سيارتي ورايح لعندا
وصرت ع الدرب إستذكر غرامي .... وبراسي عملت شي مية أجندا
على شفافي إنسكب خمرة مدامي .... حلمت إغفى على تحنان زندا
قعودي صار يستجدي قيامي ................... وبقلبي فتح مليون بندا
ولأنو الحظ ما إستنى الملامي ........ ولحتى يضحكوا نانسي ورندا
وصلت وقبل ما بلش سلامي .............. لحقني كلبها اللي كان نايم
                                 بظل الوردة الحد البرندا
                                          هههههههههههه

إلى المرحوم الشاعر الكبير زين شعيب

يا زين شعيب يا رب المعاني ............ بغيابك عم نفرط بالأماني
كلما طير ع غصنك تعلى .............. بينادي كرستك(إنتي مكاني)
قلت (يا دهر غيب وقول يالا ..... ما رح يخلق بإحساسي معاني)
وقلت (من بعدك الكلمة حيالله ......... وبلاك تيتموا عنتر وهاني)
يا زين الجسم لو عنك تخلا ................. بعدا وهرتك إلنا ضماني
بدنية شعرنا نجمك تجلى ....... قطفت من نور شمسك شمعداني
ولأنو مركزك بيقول كلا ............... لكل إنسان من طبعو الخياني
خلق بالكون زين كبير الله .................. ولأنو كان إعجوبة زمانو
                        ما رح بيطل زين شعيب ثاني

بقايا شعر

الشاعر يا إخواني إن بدي طحنو ..... بقمح القصيدة وصاغها بلحنو
بيجوز لو كسر سيوف الباس ............... سيوفو بدمعة حزنها يحنو
وبيجوز لو روق شوي الكاس ............. يفضى قبال المجتمع شحنو
لكن بيقدر تم كل الناس ........................ لولا بقايا حروف منو ظل
                             يشبع أنين المجتمع صحنو

رخصت حالي

رخصت حالي ليش يا ذلي ............... رخصت حالي تا رفعت خلي
رخصت حالي وصرت شمع نذور ........ بضوي لناسك طهر تا يصلي
رخصوا دموعي بعالمي المحرور ......... وصاروا ندي ع جبهة الفلي
رخصوا الأماني بكوكبي المسحور ....... ولفيت خيطان السحر شلي
إبن الدني في غيهب المعمور .............. كتبت المثيلة للدني مجلي
رخصت مالي وجوهري المغرور .......... وجوهر دماغي ظل متجلي
رخصت عيشي للأهل للدور ...................... للحب للطيب البلا زلي
رخصت حالي والرخص مبرور ......... تا كون جندي بخدمة الأوطان
                             ضحي وحرر أرض محتلي

سهرنا وحنان الحب جمعنا

سهرنا وحنان الحب جمعنا ............. بحروف إسمو وما تلوعنا
ضحكت فرح من وجدها العينين .......... من بعد ما أيام دمعنا
والحب حرف وحرف بين إثنين .......... نهر وإجا يجمع منابعنا
كل المعاني بقلب هالحرفين .......... شال الزهر منهم ألف معنا
يا حلوتي يلي وضعتك بين ............ جوز الروايا وبين مرجعنا
نامي إرقصي غلي بنقدة ودين .. وشوفي الطريق اللي بينفعنا
ووجه القمر والحب ع الحالين ........ غنوا التلاقي ع مسامعنا
تا صار كلما يلتقوا القلبين ............. ينذر ويوعدنا حنان الحب
                        ويصدق وتحلا سهرتو معنا

إبن الأرض

أنا إبن العرض والأرض إمي ..... خلقت من مشتل الإحساس ضمي
خدا بدمع عينيي تبلل ...................... تا نمحي هالليالي المدلهمي
أنا بعروقها للعيش جدول .................... نبت من ميتو للناس كمي
حملت إسما بهالدنيا وما بخجل ............... لأنو بمسكبتها خير أمي
أنا ع ترابها مقاوم استبسل ................ دفعت الدم حتى تظل قمي
برضى بمتنها حارب وإقتل ........... وعزيزة تعيش ما تحمل مذمي
أنا حسون بالإبداع ترغل ................... شاعر فاض ع الدنيا خضمي
رسمت الفجر ع منبر تكلل ............... بجواهر كلمتي ومخزون يمي
أنا منها سياسي لو تنقل .................... نسر ما تهيب الدنيا المسمي
بحمل عزها راية ومشعل ...................... وثقافة من مهمة ع مهمي
أنا سوري أنا المجد الترسمل .......... بخمس حروف سورية المهمي
برفض بالدني ما ظل أول ................ وتا تبقى بلادنا أرض الكرامة
بضحي فوقها بروحي ودمي

بكرى يا محبوب

يا كلمة الحب بتعرفيني ....................... وع طاقة البسمة بتنطريني
معجون فيكي بالندي المسكوب ........... ومعجون فيي دمعة سنيني
يا كلمة الحب المعك عم ذوب ................ وآخك الغلت في شراييني
كلما إندهت حرفك على المكتوب ....... الصرخة بنهيدي تعود تضنيني
الحرف الجمالو بكلمتي مطلوب ........ يرقص على سطوري وعناويني
لو ما إنغمس في نهرك المقلوب ........... ما توج الفرحة وعطي الزيني
ولو ما سقي من كوثرو المرغوب ............... لون الطفولة من تشاريني
كنت سكرت ع ملحمة أيوب ................. ودمعي ع بكرى عاد يكويني
ومازالني يا حلوتي مكتوب .................. بحرفين فيهم دنيتي وديني
حني على قلبي الصفي مصلوب.......... وع سيوف عينيكي لا ترميني
وبري بوعدي الصادق على دروب .............. وعد الوفي بالقلب خبيني
وبكرى إن إجا المحبوب للمحبوب .......... وإنتي حبيبك ما وقف حدك
                                 أوعك بدمعاتك تلوميني

نقل فؤادك

بعرف ببحر العاشقين المخملي ........... قيس الملوح كان مثلي مبتلي
تعلم بحبو والوفا ع الترغلي ................ وألف قصايد خالدة من منهلي
ودار الزمن دورة مراحل كاملي .... وجاب الهوى والعشق من عندو إلي
وقلي يا شاعر نقل القلب الكبير ............. "ما الحب إلا للحبيب الأولي

فنجان قهوة

حرفي مع دغوش الصبح خلقان ...... وحي الطبيعة ولهفة الريحان
وقطرة ندي ع وجنة الزنبق .............. بترش عطر وفلسفة وألحان
وإيد الطهارة ع مدى أزرق .............. بتخرطش الفجر البدي قلقان
وخمرة نضارة بنشوة المطلق ................... بتقرب الإنسان للإنسان
حرفي سلام ولوعتو بتسبق .................... نهدة الإم لإبنها الغفيان
وع المعتدي نارو بغضب أنزق ....... رصاص وبارود ودمدم ودخان
حرفي قصيدي شهدها تدلدق ............ بفنجان قهوة بلذة الوجدان
كلما سكبت حروفها بتشهق ................... حرف عاشق شفتو شفة
                                 وتم الحبيبة شفة الفنجان

كيدهن عظيم

وينك يا آدم فلسف العنوان .................... وخليك معنا بيضة القبان
وحوا إذا تحديتها بتشوف ................... منها المكيدة ولهبة النيران
إياك تقرب حدها المزلوف ..................... وإياك تهدم سور هالبستان
من فرد تفاحة بزمن موصوف ................. بعدك لهلق بالدمع غرقان
زوجة تركها زوجها بظروف ...................... لما عشق حورية الأزمان
حبا وخطبها وصار حولا يطوف ........... وعلق فؤادو بعروة الفسطان
ومرتو التركها كيدها معروف ................... حبت أبو حورية المرجان
وتزوجت منو وصبح مألوف ............ تصفي حماتو لزوجها اللي خان
وصارت تحط شروطها بحروف .... كل حرف جمرة وكل سطر شعلان
وهو ينفذ أمرها المحفوف ..................... بمخاطرات العاشق الولهان
وأضحت حياتو من التعاسة قطوف ....... ليلو ضبابي ومشرقو دخان
وتعلم الدرس الع حد سيوف ........................... إنو الجنة أصلها حوا
                                    ولهبة جهنم لعنة النسوان

عمري

عمري أمل مكتوب فوق وراق .......... وبين السطور منهنهة اللمعة
جفنين نحنا بغمرة الأحداق ........... تلاقيت فيكي وذبت بالجمعة
وكلما جفن جن ولنصو اشتاق .............. تا يندهو بيبعث إلو دمعة
وبيصير شاعر من نهر رقراق ............... لما الغوالي تكون مجتمعة
ياريت عمري تقمصو الأذواق ......... وكل يوم طلة وعاطفة وسمعة
وكلما غفي جفني ع حبو فاق ........... كلما بكي غسل خدود الورد
                              وضوا حياتي بحبكن شمعة

ورقة أمل

قالت يا إختي كثير نعساني ................. سنينك من الآلام تعباني

مفتوح شباكك على النسمات ................. يما عليكي الروح قلقاني
بكيت الإخت ورسمت حكايات ....... وصارت تقول بحرف وجداني
بسكر من طموح الألم درفات .............. وبيذوب تحنانك ع تحناني
وع الباب شجرة شهدت خيالات ...............عليها ثياب العمر بتعاني
نادت خريف اللون والصفنات .................. بلشت إشلح ثوب ألواني
وكل ورقة لهالبنت بالذات ...................... نقطة ببنك الروح خلقاني
الورقة الأخيرة تقول جسمي مات ........ وبوقوعها بيوقع عمر جاني
الإخت الكبيرة رسمت البسمات ............ و بعيونها الدمعات علقاني
قال يا إختي دشري الحزات ............... وقومي تا نفرح بعد حرزاني
وراق هالشجرة إن زمنها فات ................ بتتمسك بثوب البلا الفاني
بتطرز حكايات وحكايات ........................ ع خد  ورقة روح شعلاني
ومرت ليالي القهر واللوعات ...................... وبلش ربيع الما إلو ثاني
والشجرة عليها التجدد بات ................... بوراق خضرة عملت عياني
والبنت شلحت مشلح الآهات ................. وعادت تفوز بثوب نيساني
زارت الشجرة وضمت الورقات ..... وع الغصن شافت ورقة بلاستيك
                                 كانت بحب الإخت ملياني

كل صبحية

لما الشمس بتفلفش الديجور ........... والنور يظهر والندي يفيي
بيركض عليكي يصبح العصفور ...... ويرسم إلك لوحات شعرية
والفجر بعيون الأمل مسرور .............  شافك صور لكن طبيعية
غطى عراوي الزنبق المسحور ................ وطرزلك بلوزة بأنانية
ونحات إبداعي نحت بصخور .......... الجسم التوشح بالنعومية
ولهفة موسيقي صب فيكي شعور ...... ع تخت ترنيمة سماوية
والشاعر العندو الحنين سطور ............... قلك بنهداتو الحميمية
ظلك قبالي مع صباح النور .................. تا خمرك أفكار بالكلمات
وأكتب جمالك كل صبحية

خيار

نحنا بلادنا أرض العدالي ................ أرض الموهبة أرض المعالي
أرض اللي عليها المجد نوه ................... بكتاب العز وبسفر اللآلي
نغم حسونها التفكير توه ............. وسحر من رقتو العمق الخيالي
الفجر من غير طلتها تأوه ........... وفقد من رونقو الحس الجمالي
وعندما فكر هالدنيا تشوه ...................... بفعل غربان طلوا بالليالي
حمل بارودتو تزيا المموه ............... رفض المساومة وضحى بدمو
                         ونزل تا يقاتل بأرض البسالي

الدنيا هيك

الدنيا الحولنا عليها ملامي ............. وإلنا مش عم بتضمر سلامي
خلقنا بمتنها ذكرى وموعد ............... وعليها منترك دموع الندامي
الفرد بجوها بيزعل بيسعد ................ بيعمر معرفة بيهدم ظلامي
وهي لشعوب الأرض منجد ........... أسامي بتكتب بتمحي أسامي
الحكيم بعالمو للعلم مرصد ................ حروفو لفايدتها بحر طامي
بنى بالمجتمع خمسين معهد ................. تخرج ناس تلبق للزعامي
رفع قيمة حلاها بكل مشهد ........ وسكب من خمر إبداعو المدامي
وظلامي فجر وذبح وعربد ................ وفتى بالشر تا نرجع قرامي
الدنيا بيدر الفعل المحدد ...................... خير وشر بغراب وحمامي
منها منقطف الفعل المزود ................ بعمل خلاق بحساب الشهامي
ولأنو غيابنا عنها تأكد ........................... بأمر خلاق جبار وعصامي
ضروري ما حدا يزعل ويحرد ................... هيك فوق هالدنيا خلقنا
                              ورح منظل تا تقوم القيامي

سهران وحدي

سهران وحدي بين أوراقي ................... طرز وفصل ثوب أشواقي
وعيون ع غياب الولف ناحوا ................ والفكر أهب كلمتو الراقي
وظنون لا هديوا ولا إرتاحوا ...................... والعقل متأمل بخلاقي
والقلب صارت تعصف رياحو............... والكاس عوكر دمعتو الناقي
سهران قلبي بظل إلحاحو .................. يطل  الحبيب وإربح سباقي
وإفلش ولوعي يرافق جناحو ..................... مثل طير بجو إشراقي
مثل جندي مرافق سلاحو .......................... مثل فجر النور بيلاقي
مثل مجنون بوسع ساحو .......................... إلا لليلى ما عمل ساقي
ومازال عمري بطور إصلاحو .............. وبديت جروحي تنال ترياقي
ومحبوب قلبي الشكشك رماحو ................. داوا لهيبي بأول عناقي
وسطور شعري بمجدهن لاحو ............. وصفى على صدر الأبد لاقي
وحبي لجسمي طيب جراحو ......... حسيت عادت دنيتي من جديد
                            وعمري الباقي لملم الباقي

جيل ١٩٧١

يا وليم الضمة الربيعية ................................بالحب بحميها بعينيي
هوذي شباب الروح بالجولان ............... بيغدوا ع البساتين يومية
حبيت من شعري من التحنان ................... قدملهن بالعاطفة هدية
وإجمع حروف السحر والإيمان ....... وإنحت شوية وجوهر شوية
عرفتنا يا خال ع شبان ......................................... ما بتعرفهم أنانية
إخوة ربوا ع شرشف الخلان .................... الله زرع فيها الحميمية
عاشوا سوا وربيوا سوا إخوان ............. وتعلموا الدرس بصفا نية
وظلوا قراب لبعضهم جيران ................ والخي ظل يقول يا خيي
وكبروا وبعدو عمرهن نيسان ................. وتذكروا ماضي الطفولية
وعادوا لحضن الأرض والوديان ......... ومثل الزهر ع جدول المية
تلاقوا برحلة والأمل عنوان .............. و رفضوا حروف تظل منسية
ومازال بعدو الأمس بالوجدان ............. ومازالهن صحبة رح يظلو
خلقوا سوية بيفظلوا سوية