يا عيد

وينك يا أضحى مغير العادة ّ............................. وجايي ع شرق الأوسط تدادي
حامل لنا الفرحة بثوب جديد ............................................ يما قنابل نار وقادة
كنا طفالى نقصدك تا تزيد ....................................... الحب بزمننا الرايق الهادي
كبرنا وثمر عشرك أملنا يفيد .................................. المؤمن التايب يمنحو عبادة
ولما الدني فاتت بنار وقيد ...................................... وقتل ودما ع فكر إلحادي
صفيت طفل مهشل وبتريد ................................... ترجع ع مرجة وردنا النادي
وشفت الطفالى بدمعها بتميد .............................. الأبيض تشوفو بعينها رمادي
حملت أمانيها لحلم بعيد ........................................... والقهر زين يومها الغادي
الفرحة يا أضحى وين بالتحديد .................................. دور عليها بدمعة ولادي
سهرت عيون الناس ع مواعيد ............................. بصوت المدافع تصنع شهادة
كان الأمل يا عيدنا تا نعيد ....................................... النحلة ع زر الزنبق النادي
ونحنا منرجع نفرح بهالعيد ........................................ لما الغايب ع ديارو يعود
                                       وغصن السلام يحل ببلادي

شهداء السويداء

شهداء السويداء

217 شهيد و168 جريح تصدوا لقطعان داعش الارهابي

(في السويداء المدينة والسويمرة والمتونة ودوما ورامي والشبكي والشريحي)

الأربعاء الأسود 25/7/2018

دمع السما ع خد سورية هما ................. يبكي رجال العز وسباع الحما

محوا ظلام الليل وفجور العما .......... بفجر الجمال الع حضن أمو إرتما

غفوا الجريمة بفكر ع الخير إنسما .... ورووا غمار الورد والجوري حما

وشقوا طريق من الحمية إنما ................. تعبد بدمع العين وبطهر الدما

درب الشهادة بالبطولة بينفت

ح .................. من جنة الريان ع مجد السما

فشة قهر

أنا النهر الما رح يوقف مسيري .......... بكتب شعر للحظة الأخيرة
حياتي معمدة بدفقة جراحي ....... وحب الأرض زادي والخميرة
أنا شاعر سقيت المجد راحي ....... وبكركة خالقي تعتق عصيري
نفحني عطر مع طلة صباحي .......... وبعثني نور من ديرة لديرة

وبعد ما بالمدى شبّق جناحي ..... وصرت شاعر خيالو شكسبيري
رجعت إبني على الزرقا نجاحي  مجد ما بتلحقوا الروس الكبيرة
إلي تلاثين عام الشعر واحي ... بلوني الأخطلي وفكري الجريري
حكمتو بكلمتي بكل النواحي ..... ولبس من هالتي التاج الأميري

ولأني بالبلاغة البكر ماحي ............ النهج العمدو الرأي الضريري
ما بدي إمنح الأعمى سماحي ....... ولا بدي الجاهل يقرر مصيري
ولا برضى كون إلا فكر صاحي ......... مازال النور بجيابي ذخيرة
بدو يظل ع المنبر صداحي ...... مع رفاقي اللي فيهن ذبت غيرة

إنتبه يا مفتكر تكبح جماحي ......... بعد ما صارت الحالة خطيرة
إنت في عتمة الليل الإباحي ....... حرامي بتعرف بأمرو العشيرة
مازالو الناس عم تشرب قداحي ........ وإله الشعر طرزلي سريري
لا تحلم زت بالكلمة سلاحي .............. أنا بجوق المرايا بظل أكبر
                            من شعارير وعقولن زغيرة

حوا الخطية

يا أنثى تغلغل بصدري هواكي .......... دمعي باع عيني واشتراكي
وعيوني دشروا كل الجناين ...................بجنة ربنا ومشيوا وراكي

بعدك حرف بيداعب دواتي ................... وبعدك نهدة اللذة بذاتي
وبعدك عاطفة عمري المقدر ................. ومرجوحة حياتي يا حياتي

إنتي من كرم الله غنايم ................. كتبتي بالحلا جرحي ونهيدي
ضلع من صدر آدم كان نايم ................ وعند ما فيقو طلعت قصيدة

خلقتي لوعتي وفيي سكنتي ...................قربك نار بعدك نار جايي
أنا مراية حياتك بس إنتي .................... صورة من عذابي ع المراية

أنا وإنتي سوى ندك ع ندي ................. الدني بوجودنا ضلعا تقوى
مش بحوا تحسي وهيك بدي ...................... بيعمر بيتها بآدم وحوا

حوا شو حكا التاريخ عنها ................. حلاها عايش بروحي بظني
طلوعي من الجنة كان منها ..................... بقلبي نارها وعايش بجنة

أنا من وقت ما بالي شغلتو .................. بهالضلع الخلق فلتة زمانو
يا ريتو بعد ما كسرة حملتو ................... يجبر خاطري ويرجع مكانو

حياتي يا ضلع صارت عجيبة .......... حلم مقطوف من جنة ولوعي
زرعتو بين أحلامي القشيبة .............. طلع من لوعتي ومن آه جوعي
عليي مرقت ليالي عصيبة ..................... يا دنيا كيف ع دمعي بتوعي
كتبتك حرف غالي يا حبيبي .......... القلم من ضلع صدري اللي كسرتو
                                     وحبرو كان من عبرة دموعي

فلاح خدك

سهرنا ورسمت الشفق ع خدك المسكوب ......... وأثمر خيالي معك جنات مفتونة
عتق دوالي الغوى وكلما اشتهيت حبوب ..... ذوقو ع تمك خمر بظروف مجنونة
كّرام عمري مرق ع كرم كلو ذنوب ................. يزرع معاصي إذا الحساد لاموني
ناذر حياتي معك إمشي ع هيك دروب ..... لا الكرم يشبع حلا ولا نشتهي المونة

بالتم هام الكرز واللون صار يروب .................. وبالشفتين تركت آشواق مدفونة
بالعين قلبي انسحر تايعيش عمرو خطوب ..مزراب يسكب شفا من نبوع مرهونة
وجبين فوقو القمر فلفش زمانو طيوب .... تقمص سيوف الجفن لعيون ذبحوني
والعنق سحبة سحر من مرمرو مسحوب ....... لمسة تهاني صلا فراشات مدهونة

كرام عشت العمر أطوي ورايي قلوب .......... وبالحب ياما إنكويت بجمر كانوني
ياما زرعت الوعد تا صار عني ينوب ....... وياما قطفت الأسى تا تجرحوا جفوني
ومع كل نهدة ألم من غيبة المحبوب .................. آهات ببكي جمر ورماد خلوني
تا صار صبري أنا يضاهي صبر أيوب ........ والجرح جاب الدوى من دمعة عيوني

المختار أبو عادل

أبو عادل إذا حرك عصاتو ............ بعقدة حاجبو الأخصام ماتوا
وع جنبوا سباع بالحزة القوية ....... سند بتكون للموقف حماتو
وإذا هاجت رياح العنترية ............ وماجوا بحور هالدنيا وباتوا
لا يفزع رح منوقف للحمية .............. وبهيبة طلتوا فينا نخلي
                            يلف بحورها بمشلح عباتو

يا إبن العم قلي مين حدك .......... الدني ما رح بتتجرأ ع حدك
المراجل قبل منا مين قدا ............ تا وقفت دورة التاريخ حدك
وشموس الفكر سيفك ضو قدا ... وككانوا عيال عمك نور حدك
حملت المسؤولية وكنت قدا ........... نحنا مين فينا الكون قدو
                         وإنت فينا يا خيي مين قدك

وإذا هالموطن تكوى بجراحو ......... قريبة ع الدني يطلع صباحو
وقفت ع لوعتو شاهد تنقل .......... تضمد جرح دامي من صفاحو
حكي قلبك على المبدى استرسل ....... وقلت يا أهلنا فينا إرتاحوا
الطير المن ضنا همومو تهشل ...... عملت تا يعود ع بلادي جناحو
يا إبن العم احكي بكل محفل ............. وطنا راجع يسوكر نجاحو
ما بدنا بكثرة الأحداث نخجل ........... ولا بدنا حقدنا تلعب رياحو
الوطن بقلوب كل الناس أول ............. وحدة كاملة بمطلق بطاحو
وعلى المحتل بدنا الشعب يسأل .. ما بدنا بوجه خيو الخي يوقف
                          ضروري ع العدا يوجه سلاحو

يا بو عادل نزل شعري عياني ...... وباسم السبع عم ناخذ ضمانة
العيلة حدك بهالحد إقطع .............. لسان الما عطي بلادي مكانة
العيلة حدك بحملو تمتع ...................... لأنو منعرفك للخير باني
العيلة حد من بيتو بيطلع ........ تا يقضي ع المكيدة وع الخيانة
وإذا حملت الأمانة بهيك موقع ....... ما رح بتزيح عن دربا ثواني
ولا رح بالخطية يوم توقع ................. وما بتميز ديانة عن ديانة
أمانة حملت حتى تصير مرجع ........... وإذا رجعنا لفجر الأولاني
وقرينا كل تاريخك بيطلع ............... الأمانة تشرفت فيك بزمنها
                            وإنت بالمقدرة قد الأمانة

خيالات

مبارح بعرس الحقل كنا سوى عناقيد
                                                ع فرد غصن الهوى بالحب محضونة
واليوم هر الورق والكرم صار نبيد
                                        وما ظل منا سوى خيالات مجنونة
وليلة بغفلة نعس طلت من مواعيد
                                 دفتر خيالي وإجت تا تحرقص ظنوني
تجلت قبالي سحر والخصر صار يميد
                                           يكسر قناني الغفا ويفيّق النونة

دقت ع قلبي بهدى من شوقها بتريد
                                    يسأل نهيدي يا روحي مين بتكوني
ضحكت وقالت أنا حوريتك بالإيد
                                  وأكثر حروف الغزل صاروا يعرفوني
ناديت ليها إرجعي نكتب صور ونزيد
                                وخلي حروفي صلا فراشات بجفوني
لما هجرتي الورد صار العبير بعيد
                                     والنبع سقسق ألم من عين محزونة

فتحت عيني تا شوف البلبل الغريد
                                  راجع ينقود من الحبات والمونة
غابت وحقل الأمل يا ريت فينا يعيد
                               قصة هوانا وصور بالقلب مدفونة
المفروض بين العشق والشوق والتنهيد
                             غمض عيوني بشوفك حلم كانوني
غمضت عيني خيالا تكّون من جديد
                                  مثل الكأنو إنطبع برواز بعيوني