كتبت ونشرت هذه القصيدة بمناسبة تحرير بطلنا صدقي المقت من سجون الاحتلال الصهيوني يوم ٢٠١٢/٨/٢٠ بعد ٢٧عام قضاها في الأسر واليوم يدخل معركة إعتصام ليقاوم ورفاقه الغر الميامين بأمعاء خاوية سجن القهر ونحن معك يا بطلنا للتحرير والنصر القريب:
إفرح يا (بو فخري) بعودة نسر ضج الفضا من شبقة جناحو
عاد البطل رافع جبين النصر وبلش وطنا يلملم جراحو
نسر الحما كّمل حبوب اليسر ودشّر الحبس و جور مفتاحو
حر الضمير وحر رغم الأسر وحر الشمايل والوفا سلاحو
إفرح يا (بو فخري) المدى فرحان فجر التحرر طرز الألحان
عاد الحبيب الطّول غيابو الصّفا لمجد عروبتي عنوان
أول سطر بوسة من كتابو رسالة وفاء (لهايل) و (سيطان)
و ثاني سطر للبيت و عتابو لرفيق دربو لقائد الميدان
(صدقي) بحر عاطي من عبابو كنز و ع صدر المرجلة نيشان
تربى ببيت العاش ع حسابو عهد الكرامة و زّهر البستان
يا مجد شوف البيت و عشابو بتقرى على سطرو الوطن ألوان
عمي ( أبو فخري ) سبع غابو شيخ و مناضل ملهم و ديّان
(فخري) بطل وفّا بأتعابو و خلى سورية صوتها منصان
و (بشر) اللي عمّد و حي سرسابو علّم الدنيا دروس بالأوطان
و( نهال) معهد مين طلابو غير الغيارى و كل عالي الشان
و (صدقي ) السيف الدّشر قرابو للحق حدو و للمجد قربان
و رغم الأسى و ع عظمة مصابو باقي وطنا قبلة الأزمان
بيبكي شهيدو فوق محرابو بيوقف بوجه المعتدي اللي خان
بيرقص بعودة أطيب حبابو الشّلق السجن و عقّد السجّان
بيفتح لضيفو القادم بوابو هيكي سورية قبلة التاريخ
و هيكي قلاع المرجلة الجولان
إفرح يا (بو فخري) بعد في روح و بكرى أمل بيفتح زهورك
صرلك عمر بكتابك المفتوح بتكتب ع سطر المجد دستورك
صرلو عمر جولاننا مجروح مخبى عبيرو و ناطر عطورك
من حيث إبنو مهّشل و بينوح و سجن البطولة معّتق نسورك
الجولان فيك تقمّص و مسموح قلك إعذرني طلّ من نورك
من وقت ما تقّدر علينا نزوح تقدّر عليك يسافروا طيورك
و هلق رجالك شوفهم بصروح عز و كرامة و طيب ع صخورك
و اللي بقي يا شيخنا تا نروح نرجع هنايا لتربة الجولان
و نرجع وفايا نطّل و نزورك
و (صدقي) صدق وعدو و بقي جبار نسر الكرامة للعتم شقّو
جبينو تكلل بالعطر و الغار و حساد مجدو تحطموا و طقوا
بالمحكمة رفرف جناحو و طار غنى و (حماة ديارنا) ترقوا
كل حرف كلمة قمصو بمسمار بنعش الأعادي تعملق و دقو
حلو بقا حيط الظلم ينهار و يطل نور الما حدى عقو
حلو النسر يرجع نسر طيّار و نجوم مجدو النسر يتلقّوا
حلو صباح الفل و الجلنار بعطر الكرامة جونا ينقوا
و يبقى ربى الجولان ليل نهار معهد أصالة و فلسفة و تاريخ
و مظلوم لكن ما نسي حقو
و سبعا و عشرين عام يا خيي عشتون قهر و صمود يومية
بتكتب لتربة مرجعي تاريخ بتعطي دروس بروح قومية
إحتلوا الدني برصاص و صواريخ و قتل و دما بأبعاد وحشية
و نحنا تركنا الكون منا يشيخ من نور جايي ع صفا نية
نحنا شجاعتنا عصاية و صيخ و كلمة و قلم و بيوت شعرية
و الحق عنا وصّل المريخ و عم نطبعو كلمة ع وجه الشمس
جولاننا معناه حرية
