مرثية طهر

(كسرى) كسرتي القلب من صوت بيعاني
وعينين (سعدى) العلى الفسطان بكياني
نادت يا بنتي نطرت تزيني الفسطان
وشوفك عروسة قمر ضوا بتحناني
و(بهزاد) دمعو نزل ع مخدة الإيمان
بيحلم بطلة فجر بخدود شعلاني
نادى بدمع الأسى ريتو الفجر ما كان
ولا تغيب عني اللي كانت وهج ألواني
كانت بعز الصبا بأول صبح نيسان
وردة رسمها الندى بأحلام قلقاني
بيخجل ربيع الربى مع طيفها الفتان
كلما عليها بدى ببسمات حرزاني
(وديان) بكيت ألم من دفقتو غدران
و(جاد) و(جواد) إنضنوا ع إخت غفياني
والبيت بعد الفرح والحب والألحان
صفى كيانو فجع وخشوع روحاني
شو صار شو اللي جرى تا تفرقوا الخلان
(وجدان) كانت أمل صفت جرح قاني
تمرجل عليها بغدور من قلب صوان
مجرم نقلها غصب ع دنية مجاني
غبنو بعتم القبر يتكفن الوجدان
ويموت صبح الطفولة بخنجر الجاني
ونقول ريت العدل والحق يا (وجدان)
بيعم كل الدني ويعود وجداني

والله يرحمها ويصبر أهلها وإنا لله وإنا إليه راجعون

سهرانين

لا تحجبي نجومي ببراديكي ........ إنتي لقلبي بعشقنا شريكي
معقول فيكي يخلص المعقول ..... وبالحب ما بتخلص لياليكي
بالي عليكي بالعنا مشغول ............. ومشغول حققلك أمانيكي
وبحس دمعاتي اللي كرجوا نزول ... نزلوا قوافي من معانيكي
عشقي من الزنبق إجا مرسول .......... معنى ملون من أغانيكي
سلسال من عظم الأبد مشغول ........ قطفة أماني من معاليكي
حلم أخضر بالفرح بيجول ............... يرسم سلامو ع  علاليكي
حرفين فيهم للتلاقي قبول ......... سحر الحلال العم بيعطيكي
كيف بدي يظل عمري أفول ...............وما طرزوا بلذة تجليكي
طلي قبالي كل يوم نقول ............... بحبك تا يحلو اللقا فيكي
ما بحس حالي خايف ومقتول ...... ولا خف حبي لو بجافيكي
مازال فيي عايشة ع طول .............. ما بنطر اللحظات تجمعنا
                            بقلبي مع الدقات بحكيكي

سلمان

كل يوم عنا ظاهرة بتبان ................ بيعجز لسان الحر بالتبيان
مبارح حياتي الضوت شموعو ...... واليوم سلمان القضى إنسان
الله خلق هالناس بربوعو .......... بمحض العدالة وصنعة الأزمان
ونادى تحبوا ويا بشر أوعوا .... تحثوا النفس ع الظلم والعدوان
إشقوا تربوا إشبعوا وجوعوا ........... الإنسان فيه رسالة الديان
وتذكروا لو بلش ولوعو .............. كل قلب ما فارق وفا دفيان
بعزي جبلنا الحر وجموعو ............ بسلمان والطيبة العليها كان
دمعة عيوني شاركوا دموعو .... لشمخة جبلنا والأهل تا نقول
يرحم ترابك نام يا سلمان

الله يرحمو ويخليلنا نخوة الشرفاء بالجبل الكريم

دقي على بابي

دقي على بوابة سنيني ................ بعدو الصبح مستنظر الزيني
والليل ناسيني على البلور ................. ناطر فراشاتي وبساتيني
دقي دخيلك فيقي الناطور .......... حلّو الصبح يطلع على الهيني
يكشّح عباية غيمة الديجور .......... ودغوش شوفك عم تنطريني
مشتاق قلبي للفرح والنور .................. وفيروز ترسملي عناويني
وإحمل معي زوادة العصفور ................... تا يرجع يلحن قرابيني
دقي على الراعي وعلى القرقور .......... وع بلبل الحقل المخليني
غني صلا ترنيمة المنثور ................ ويرجع شبابي الكان ناسيني
بعرف بيقولوا الشاعر المسحور .... بينحت على الطرز الشياطيني
لكن زميلي لوعة البخور .................... وصدق النوايا ظل كاويني
دقي ع قلبي هالقلب معذور ................. ياما نده خلفك إستنيني
وياما كنت حرف الملان سطور .............. عبر عن الحالة بتلاويني
دقي فجر حافي مشي ع صخور .... طرطش ع خدا من رياحيني
ياما كنت من لهفتي محرور ................ وتشعل بقلبي نار شلغيني
دقي على آخي دوى وشعور .................. بعدك حياتي يا تقبريني
دقي مساميرك بجسمي زهور ............. عمدتك بعيني طهر إنسان
                                   بقبل خطايا لو حملتيني