تدمر

تدمر
٢٠١٦/٣/٢٦
بقصر زنوبيا فتّح قمرها ............. وعبق تاريخها عبى حُجرها
ومثل ما كتبت مبارح مثيلة ......... بغيرة أهلها فاضت بُشرها
رجعت تدمر القلعة الأصيلة ...... بعيون الخضر للقلب النطرها
نفضت غبرة القيمة الهزيلة .... تا يبقى الكون نقطة من قدرها
تدمر مين يا أيام ميلي ........ إسمعي يا نجوم إشهد يا قمرها
ذو القرنين ع سرج الأصيلة ......... نزل مع حملتو بأول سفرها
بنى فيها الأساسات الثقيلة .... لحضارتها مش قصور الهجرها
وبارك أهلها وناس القبيلة .. اللي سهرت تحرس القيمة النشرها
وأُذينة عندما قاد السليلة ...... وغفي مرتاح وجروحو عصرها
خلفو قامت الزوجة النبيلة ............. ذلت أورليان اللي أَسرها
وبعصر النور وبعصر الفضيلة .... مرق أحمد على رمال النثرها
هدم أركان كذبة مش قليلة ........... ونقل للنور هالة من نزرها
وبعد ما دارت الدنيا بحيلة ...... وملوك رمال بجت من بطرها
ساقت تحت جنح الإسرائيلي ...... عساكر غشها راعي بقرها
إجت ع واحة الشرق الجميلة ........ وتدمر كملت فيهم عِبرها
ورجعت بعد هالليلة الطويلة .. مثل ما كسرت الرومان كسرت
                       داعش والوراها ع حجرها

الرجولة

الرجولة مش فقط زند الفتوة ... ولا ساعد غضب بيزيد قوة
ولا صوت الهبج ع شكل مدفع ...... ولا تشبيح بالعزم المدوي
ولا سيف البيحدو رقاب نقطع ......... ولا كل يوم ترمينا بهوة
ولا بالفلسفة ننزل ونطلع ............... ولا بالغدر والحيلة نجوي
الرجولة قدرها أكبر وأرفع ....... الرجولة مقدرة بعقل المضوي
وتا تعرف قدرها يا كون إسمع ...... عن رجال الوهبها الله خوة
حكمها بعقل من نورو المشعشع ..... وقلوا بالتقى إفعل وسوي
لأنها من نعيم النور مقلع ..................... خلقها ربنا خزنة ثمينة
                               وكرمها بجوهرة النبوة

ع موعدي جايي

لا تفزعي ع موعدي جايي ........ وعدتك ما عندي بغيبتي غاية
إنتي حقيقة بس شمس العون ......... صورة من براويز الحكاية
فجرك ربيعي كل يوم بلون ............. مشتل عطر والزهر بوكاية
وشمس الطبيعة تا تضوي الكون ........... بتزيح عنك ألف برداية

جايي وبقلبي من الشوق كثير ................ لهفة طفل للإم للشمة
شوقي حروف وسحرها بيسير ........... بين عقلي العاشق وتمي

مشتاق غنيلك بصوت الروح ............. بنغمة شجنها فيّق ظنوني
غيابي زرعلي في نهيدي جروح .. ومعقول زرعك غلّ من دوني؟

سمعتك حبيبي بصوتك الحساس .. وبحة فكر مجنون ناديتي
ومنشان ما تشلّق ظنون الناس ...... شلقتي بعربة معتقة بيتي

خمرت بجراري المحبة طيب ........ وقلت يا سلسالها إنطرني
عتق حنيني بالعروق وغيب .. ومثل الندي من جديد ظهرني

راجع رجوع المي للأنهار ............. رجوع الندي للزهر للحفي
رجوع الحلم ع وتار موسيقار  .. تمتم جروحو حب ع الشفي

وبكرى إذا نادى الفجر تصريح .... وقلّب شعورو فوق أوراقي
بيصير دمعة في مهب الريح ........ غاب وتركها ع طلل باقي

وحبك يا عيني سبب ولوعي .. وعم بحترق من شوق جواني
تمتم فؤادي داخل ضلوعي ........ لحن العشق ع وتار وجداني

وعنقود عمري خصل حبوبو ............... بين تمو العاشق وبيني
وجوى الأمل نادى ع محبوبو .. سحرك رسم صورة على عيني

ومن بعد غيبة كلها سرساب ....... فرض الدمع بالحب صليتو
عصفور قلبي من ضلوعي غاب .. وتا يرجع من جديد ع بيتو
القلي إنطرني العمر فيي طاب .... بلهدات فكري شو إستنيتو
والورد صفى بين طاب وطاب  .. يسقسق عطر ع درب حبيتو
ورجعت حامل من حروفي كتاب ..... عنّيت آمالي وما عنيتو
ناطر حبيبي المن غيابي داب ........ يغمر حبيبو الطلّ يا ريتو
وما زالها بتتكسر الأسباب ............. بملقى الأحبة وهمّ خبيتو
من قبل ما أوصل أنا ع الباب ..... قلبي بدقات الأمل والشوق
                         قلي بحبي الباب دقيتو