المش عاجبو

المش عاجبو جو البلد يرحل ..... يدور بطيشو ع وطن أفضل
تا نشوف بعد البحث والتدوير ........... أيا جهنم فيه رح تقبل
ومن دون ما يدقدقلنا مسامير ............ بعدو وطنا للفدا منزل
وبعدو شجر ومروج وعصافير .... وحب وبراءة وللفرح مغزل
تأمل بجدول سار وقت كثير .. بين الضفافي مسرغس مبشلل
فكر يهاجر موطنو ويسير .......... ع بحر حاوي كنوز ما بتجفل
دشر بلادو وعالم التصوير .......... وغاص بقرار مواج وتشنطل
قولك يا متغرب بلا تفكير ........ هلق شو صارت حالة الجدول
وتفاح ع غصنو كتب تعبير ....... من خدود حوا لمعتو بتحصل
حب الهجر وتعلق التغير ............ وصفى سفرجل أصفر مبجل
وكلما الحبيبة بالجمال تطير .............. وخدودها باللون تتجلل
أفضل إذا تفاح خدا نشير ........ ونوصف يا إما نوصفو سفرجل
خمسين عام وحالنا تعثير ................ وجولاننا عن قلبنا مهشل
جرب شارون وبيريز وشامير ..... بقهر الحاخامي يحطنا بمعزل
وما عاد فينا نقبل التقدير ............ ونظل مدة من الجفا أطول
هيذا درس تا تفهمو بتصير ............ تعرف يا إبني قيمة بلادك
                            وحبا بقلبك يفضل الأول

غنيت

غنيت كلمات الفرح وحدي ......... وفيي دموع الشوق متحدي
وساعة ما بلشت الصلا تراتيل ..... كانت نجوم الليل عم تحدي
والفكر ضوا بلوعتي قناديل ... وباقي المجرة بتشحدو شحدي
خليت ع همومي زماني يميل ...... ما زال عيشة عمرنا وحدي

نذرت عيدي للوفا قربان ....... وقربان ثاني كرم معروفي
وقلت بعدو مطمعي الإنسان .. بقطف بوجدانيتو حروفي

الدنيا لنا بستان للأسرار .... طاووسها بحوضا نفش ريشو
تحدد زمانو جمعتين قصار ...... تحيرّ وفكر كيف بيعيشو

معقول ينسى عز مقدرتو ............. ويعربد شوية بلا ريبي
بيومو يكسر همّ آخرتو ....... ويرجع شبابو يروتش الشيبي

ومعقول يزرع بالدني أعمال ......... ميزان ذرتها بألف كفي
إن كانو فضالو بالحياة قلال .......... لكن خلودو عزز العفي

بفكر شو عنا بالدني دراويش . الجيبة ضعيفة والزمن قسمي
ما أجمل الدرويش لما يعيش ....... من كنز تمو يوزع البسمي

وطموح درويشة بوردة حب .. والنفس عم تصفى مشاربها
حلمت تكفي مع حبيبا الدرب .... ويطل بالفرحة تا يخطبها

ما أجمل التاجر بقرش الخير ...... يشبع ولادو وتعمر ديارو
غير اللئيم الما بيحب الغير ..... وكسّر ع حاجة أمتو جرارو

وما أجمل الخمار من دنو .......... يسقي الدني أسرار فكرية
و الناس تاخذ شو بيتمنوا ........ من موسم البسمة الربيعية
وفنجان قهوة من عطر بنو .... تدلدلق على شفاف النعومية
ع شفتو ودا الكرم منو ................. نال الشكر ع شفة الغية
الإنسان من صدقو وحسن ظنو ..... الله بحكمة من الإلوهية
وداه نحل ورفقتو يجنوا ........ الخير بمدى الدنيا الحقيقية
مطلوب يرضى بعالمو لنو .............. مسّير بأقطابو الحياتية
ومطلوب تنقل هالدني عنو ......... خيرو مازالو مخيّر بفعلو
                            بيبني خلودو بصحة النية